Monday, March 31, 2008




بمبوطـــي

الي روح محمد فؤاد عفيفي (28 سنة) الذي قتل مساء يوم 25 مارس 2008 بطلقة "تحذيرية" من السفينة "التجارية" الأمريكية جلوبال باتريوت عند عبورها قناة السويس.


سويسي أنا و النقب بمبوطي
و البحر أمي و أبويا و قوتي

و الرزق له فرحة و أصله شطارة
يطلع الشعر* م الميه مليان **شبارة
رسمالي لنش مش عبارة

ويا بحر لو اتعززت مجراشي
^اللنش يرمح ألفطي
نقلة شي*** نقول ماشى
أو تمباك ولا حتى قماشي
عبيت سدري من هواك يا كنال مكفاشي

و معانا هرم و مسلة و القط بِس
وراس نفرتيتي يا خواجة
الجعران ده أصلي مش جبس
يو لاف ايجيبت...عال عال
هستفتح بدلاية و تمثال

فتحت سدري لهواك يا كنال
لو مت خدني عندك ما ترمينيش ع الرمال
عايز أقابل أبويا وجاري و ابن الخال
وأكم يا سويس يا حارسة البوغاز
يروح منك ضناكي وولادك عزاز

و أكم عدي عليكي يا سويس
من طمعان ولا ندل و خسيس
و انتي صامدة و جامدة
و اليوم بيتزف فيكي عريس.

الشعر يعني شباك الصيد*
شبارة : نوع من السمك**
سكان المناطق الساحلية يختصرون كلمة شاي الى شي***
ألفطي: من شاطئ الى شاطئ
القط بس: اسم الإله الفرعوني علي شكل قط أسود