لمولد الست رضى الله عنها
عربية مخصوص جاية من بنها
فيها رجب و سيادة أم البنات
فردوس و صباح و سامية و نجاة
نجاة بت سمرة بتبدل سنانها
جابوا جلابية جديدة عشانها
و ببركة مقامك يا طاهرة يا ست
ليلة المولد هيطاهروا البت
فردوس أخت نجاة
في المولد اللي فات...
طاهروهانزفت
و كات حتروح فيها
وربك الستار... لمايريد
قدر و لطف ..إداها عمر جديد
وآدي المولد و الزيطة
وبتاع البخت والنطيطة
و المحاسيب ينشدوا
و المجاذيب يرددوا
و صاجات العرقسوس
وتحويطة مخصوص
من عين اللي يحسدوا
و روايح و سبح و غوايش
و اللي يحب قلبه بايش
وأراجوز لابس فرو أرنب
تشد الأستك بتاعه يلعب
قبل الفجر بساعتين
ف شارع زين العابدين
رابع حارة يمين
زقاق بعد عطفتين
أرضه حجر مربع
بيت قديم على مطلع
نجاة ،الجلابية الجديدة عليها
و الأراجوز ماسكاه ف ايديها
رجب شايلها
و سيادة بتحايلها
قاصدين الاسطى شوقي أبو الفتح
فى الأوضة القبلية فوق السطح
شباكها إزازه أزرق
من أيام ما كنا بنحارب
و الشيش الأخضر موارب
شوقى حلاق و مطاهر
أصله حكيمباش فى الدمرداش
فى وسط الصالة طبلية عليها لفة شاش
جنبها طشت نحاس أكبر مقاس
و سبرتاية بتوِش و على نارها موس
وأخينا واقف لهم ع السلم بفانوس
دى العروسة؟ م العين محروسة
صلاة الزين .. مدد يا حسين
يللا ارقدى ع الكنبة أمــــــال
لجل ما تكبري و تجيبـــــي عيـــــال
البنت صرخت لما صوتها انبح
و الدم نازل منها يسح
كبسها ببن ما حوقشي
كبسها بملح و لا نفع الملح
الفجر أدن والاسطى محتاس
و البت رايحة راس ف راس
وسيادة تصوت: غيتيني يا ست
البت راحت..راحت البت
ولابقي منها إلا الجلابية والدم فيهاو لعبة وإيدها اتخشبت عليها
عزة مطر 28\1\2007