العولمة

عولمة مجرمة ماشية مكسمة
ملفوفة بجينز
وسطالستات حرمة بشنبات
والحنية حنية وز
بتبيع كوافيل ونياب الفيل
جواها يا جميل مفاتيح آل إيه
مرسيدس بنز

تيجي ع الغلبان تديله لبان
محتاج فيتامين حاله عدمان

توعده ببيوت مرجان و ياقوت
بس اشتري ريشة كتكوت
بتلاتة سحتوت
إلحق إلحق للفرصة تفوت
 ويا الريشة طلبين و حجاب
ده حجاب من شر العين و الغين
و طلب نملاه للي بوشين
الوش الأول يطلع بوش
و الوش التاني تلاقيه شين
عولمة مؤلمة أوضة مضلمة
و الناس فيها نازلين تلطيش
معاهم سكاكين و بلط و حشيش
دخانه طالع شموه ومفيش
حد شايف حد استر يا لطيف
و الدم يسيل يملا براميل
براميل بترول و الست تشيل
اسمها سامية و الدول النامية
بالنسبة لها مم و فيتامين
تفطر أفغان تتغدى عراق
و الدور على مين؟ و ده عمها سام
جنتل و همام مش بس كلام
دخل الاوضة الضلمة معاه
سلاح أشكال و الوان واداه
للسكان ده أحد رشاش
وده خد غاز سام من أنكل سام

طفي النور ووقف من بره
و دار الضرب يا ناس تاني مرة
دغدغوا بعض و كسروا الحيطة
و دول مساطيل و عاملين زيطة
طلعوا بره الأوضة الضلمة
و سلاحهم وياهم لمة
سامية و سام برقوا بلموا و نهارهم طين
مساطيل حطوا ف ايدها سلاح
طلعوا للنور
كشفوا الملعوب
و مفيشي هروب
عزة مطر
يناير2006