صنـع فـي لاظوغلي

الحـــــــــــــــــــــارة
في حارة ساكتة من حواري مصر
نزلت أمشي في صفار العصر

شفت بيوت من غلب اصحابها
شاربة المر بطول العمر
وحيطان حجر عنيدة وشايبة
شايلة تاريخ بنقوشها الدايبة

من زمن الوالي...ولى زمانها

وقدام كل بيت
كبشة حريم و عيال
ساندين همومهم ع الحيط
ساندين بقلوبهم البيت

وع القهوة كل ليلة
بكباية شاى تقيلة
و حجر تفاح ع الشيشة
ينهد تعب العيشة
على نكتة حراقة
وقافية سخنة حكمت

طق الضحك والقهوة وجت

والهم اتلم في الأنفاس وطار

يا مصري أنت واخدها جد ولا هزار

ولابينك وبين تحقيق الحلم تار