صنـع فـي لاظوغلي

عربية عربية
نفسي في عربية عربية
عجلها سوري والبوق سوداني
و لونها مصري والنور لبناني
وإزازها ليبي ولا عماني

أركبها م المحيط، م الماضي الغويط
من طنجة للحاضر .. لأرض الجزائر
لحـــــد الخليج أبو لؤلؤ دعيج

هلت علىٍِِِِ ريحة لمون
ركنت جنب شجر الزتون
جرحني سلك شايك مهين
تاج الشوك على راس فلسطين
دمك يسيل.. يوصل حطين
يطرح فدائيين..يطرح فنانين

بصيت لورا ف صورة قريبة
لمحت ظلال معابد طيبة
و شعب مصري و صبره جملي
منحول وبره ومعاه أملي


مونت ف جدة بنزين م المصفى
لســــــــه طـــــازة أول قطفـــة
حاسبوا ياخوانا من دول ودول
ايدك يا حرامي البترول
أيام العرب و البداوة
كان فيه فروسية
كان فيه شقاوة
كر وفر وشعر وحب
ومجد أزلي أسسه نفر
قالك اللي يفرق العرب
يبقى كفر
لكين دلوقت
رمل الجزيرة مخطط أسفلت
رشقوا فيه صوابع أسمنت
بدل الخيل جابوا فور باى فور

خرمت على دارفور
منجم كنوز بيفور

بترول ودهب و أبصر إيه
يورانيم اللي بيقولوا عليه
نسيج عنكبوت
اللي يكعبل يموت
فيها لئيم صاحب وشين
وش نازل دبح و تقطيع
ووش يصعب أوه ده فزيع
ستين لص و لص يا علي بابا
أمم متحــدة و هي عصابــــــة
أكلوا وشبعوا و لفوا الباقي
وفي الإذاعة قالوا يا جماعة
أرض السودان دى أرض شراقي
فيـــــــــــها مجاعـــــــــــــــــة...
الحقونــــــــــــا بأى معونـــــة
ودم الاسمر ده دم سوداني
ياريت اللي فيه ييجي فيا آنى

اكمل ع الصومال و لا مكملش
حالها من حال دارفور ما يطمنش
....تستكمل.....