صنـع فـي لاظوغلي

الكورة
عيال بتحب الكورة
وتلعب بأى صورة
حتى لو فيها خطورة

ساعة طراوة عصاري
ف بيت الأستاذ هواري
لسه الغدا يادوب خلصان
كانوا واكلين مقلي بدنجان
مفيش نزول الشارع
يا ولد يا عمر سامع
الراجل دخل يرتاح
و عمر وأخته سماح
دخلوا سوا البلكونة
وهات يا لعب و تقسيم
الكورة تخبط و ترد
وسماح تشوط و تصد
والفورة من عشرين
و الساقع بقى على مين

ف عز الضهر و الزحمة

مدرسة تجريبي إعدادي

و التلامذة في الشارع عادي
قسموا فريقين
و الجون محاور
نهلة تصرخ وتشاور
باصي يا ميدو ... اوعي إيدو

البنت ترفع ذيل الجيبة
وتشــــوط لتيفة
أما حتة دين لعيبة
إنما حريفة


و يوم شتا و أجازة
و الشارع و المترو فاضي
على رصيف إنتظار
حدايق المعادي
هناء و أخوها شادي
رايحين الدمرداش
و المترو لسه مجاش
عملوا الرصيف ده نادي
بكورة هواها فاضي
الواد يموه و يرقص
ودراعه على صدره مجبس
هات وخد وباصي
و الناس على الكراسي
خايفة ع الواد والبت
جم عساكر المترو
بدل ما يمنعوهم
قعدوا يشجعوهم
فرجة وجت ببلاش
والمترو لسه مجاش