صنـع فـي لاظوغلي

تحت العجل

بيتنا تلاقيه فوق السطوح
عشة قديمة بابها مفتوح

بيتنا تلاقيه في بير السلم
أوضة غسيل في منور مضلم

بيتنا على شريط القطر
يرقص على سطر وسطر
لما يعدي توت توت
كل العشش توسعله يفوت
عشش صفيح ف طريق أطفيح
وعشش م الخيش و هلاهيل الجيش
وفيه كرتون و خرق على قش وهيش
وعشش البوص ف مدخل الخصوص

بيتنا ف الدور الرابع
ما يهمش انهو شارع
ف زينهم أو بسيون

أبويا بياع لمون
و كبريت وف الأعياد
نسرح شايلين بالون

تلاقيه يوماتي فارش
معيشنا معاه و عايش
على دقة و شطة وكمون

أنا واخواتي الخمسة
وأمي وستي ناعسة
عايشين بأمر إلهي
يا حنين و انت جاهي
راضيين وما اشتكينا
بالغالي طه نبينا
افتح الباب علينا

راجعين م المدرسة
ف يوم برد وشتا
دخلنا تحت الغطا
دلوقت ييجي أبوكم
ونقعد ناكل سوا
قعدنا بالجوع لغاية العشا
وأمي قلقانة موغوشة

و متمة غلب اليوم
جاها الخبر المشئوم

أبويا يا خلق انقتل
داسوه تحت العجل
داسته يمه عربية
وجريت على سرعة مية
خلاص مفيش علام
بلا ورق بقى و اقلام
شقة الفول بكام
كل حي شاف له شغلة
ورشة كانت ولا مقلة
ولا حتى خدام ف قهوة
ف الشغل يابا ضربوني
بامي وابويا شتموني
وديني ما عادوا يشوفوني
ف الشارع وقفت أبيع
ورد و عيدان بخور
وشفت عيال كتير
حالهم زيي وأكتر
و الهم فينا يكبر
واحد ابوه مسجون
ومراته حيزبون
والتاني أمه طفشت
م الفقر دماغها وشت
بقيت أبات معاهم
وساعات أبات في بيتنا
معاهم كلة وسجاير
وأقراص وحاجات تدوخ
مبقيتش عايز أروح
أبات وأصحى معاهم
تلقانا ف أى شارع
ممنوع ؟ مفيش موانع
احنا ملوك الشوارع

أبيع مناديل وورد
داير أدور بجد
ف وسط العربيات
أبص ع الهوانم
وابص ع البهوات
وابص ع البدل
مين فيكم يا ترى
رماني تحت العجل